( ألا أونا ألا دوي) شعر : فاطمة علام

( ألا أونا ألا دوي) شعر : فاطمة علام

( ألا أونا ألا دوي) شعر : فاطمة علام

ايوه زى ماقلت واكتر.
أيوه قد البعد وأكثر
القمر فى سماه منور
حتى لو راح الغرام
ايوه زي ماقولت واكتر
أيوه أنا قد الكلام
إن نويت ع البعد هاقدر
مد إيدك بالسلام

ياحبيبي

لسه مش قادر تصدق
إن قلبي هايقسى يوم
وان غدرك جرح علم بالقساوه والهموم

لسه مش قادر تصدق
إن يوم هاقدر أصدك
وإن رغم العشق أقدر
أمحي من أحساسي نبضك
لسه مش قادر تصدق
إن عقلي ..
قلبي
رافضك
وإني رغم الحب قدك
قد إهمالك وصدك
قد بعدك قد غدرك.

إن قدرت
أنا برضه هاقدر
مهما تبكي العين وتسهر
رغم دوباني فى ملامحك
مستحيل أقدر أسامحك

اللى ماشاف فينا فرحه
راح لحاله
واللي حس إن إحنا جرحه راح لحاله
اللي مايحسش عطشنا واللي مايقدَّر وجعنا
واللي عذبنا وخدعنا
واللي مايمهموش ضياعنا
مالو منا غير وداعنا
يروح لحاله

ياحبيبي

اللي مكوي بجرح غيرنا
ليه يهدد بالبعاد ؟
إحنا دم ولحم برضه احتا أحياء مش جماد
إحنا سيبنا السوق وبيعنا
وانتهى زمن المزاد
إحنا فينا كل حاجه وعكسها
فينا ضحكة طببت فيكم جراح
فينا دمعه تبكي ع العمر اللي راح
فينا قلب جنين
وأوسع م البراح

إللي حاسس بينا يعرف
إننا قد الغرام
قد شوقه
قد حبه
قد تعبه
قلبنا مايعيش فى بعده
قد كل حاجة حلوه
حتى عز عذابنا فيه
نعزفه ف القلب غنوه
واللي مايعرفنا يبعد
قلبنا فى البعد أسلم
والمشاعر تبقى ذكرى
والآمان هانعيشه بكره
واللي ماداق الهوا
ولا داق عذابه
بكره يتمنى
خياله يدق بابه
واللي مايرضى العنب
ولا حس بيه
بكره يتمنى شرابه

واللي عدى خلاص سماح
حد فيكم قلبه شاري
روحنا هاتكون له سفينه

وإن ماكانش
ربنا يعوض علينا

#فاطمه علام#

 

 

اترك تعليقاً