حريقة في الجرون
حريقة في الجرون

عادل صابر يكتب : حريقة فى الجرون

حريقة فى الجرون بقلم الكاتب والشاعر : عادل صابر
فى عز الضهر والنجع نعسان ، سمعت هيصة وظاظا عالية وناس تزعّق وحريم تصرّخ ، طلعت ارمح ايّه فيه يااخوانا ؟! قالوا حريقة فى الجرون شرقة عند السكة الوسطانية ، طلعوا ناس النجع كلهم ونفضوا نوم الضهر من عنينهم ،.

 

رجال وحريم وعيال وكلاب يرمحوا ويهجولوا مشرِّق على الجزيرة فى عز النٌقّاحة ، يشوفوا جرن مين اللى قادت فيه النار ؟! ، وكل واحد خايف ليكون النار فى جرنه ، قعدت الناس تتشال وتدّق بين الدرابيس والمراوى فى القياييل والدنيا القايدة لغاية ماوصلوا مكان الحريقة ، وبصوا على النار المشعللة فى الجرن ، والنار واصلة للسما فوق ، وزعق حمتو اب عطية وقال :

 

جرن بيت عبدالعال ، جرن بيت عبدالعال ،!! والنار مشعللة عمّا تخٌم فى الجرن خَم ، والصراخ شغّال ، وماحدش قادر يجسر ويخش ع النار ، زعق الحاج فارس اب حطب وقال : حد يتصل بالمطافى ياناس بدل مااحنا واقفين نتفرجوا !! رد عليه سعد اب خروف وقال : مطافى ايه بس ياحاج فارس ؟! دا على ماجات تكون النار ماخلتش فى الجرون كلها ، .

 

دا نار واعرة يابوى ، اقلع ياواد انت هو وخش ع النار واعزلوا القِتت السليمة من القِتت المولعة وارموها على جنب ، حنقعدوا نبصّوا ف بعض ؟! خش ياواد ياحمتو ، خش يافرج ، خش ياحميد ، ياله بسرعة ، اعزلوا القتّّة السليمة وارموها على جنب بعيد عن النار ، دا قيامة قايمة يابوى ، دى مش نار ، دى جهنب الحمرا ياناس ، دا عما تبلع فى الجرن بلع ، وقلعوا عيال النجع جلاليبهم وقعدوا بالفلاين واللبسات يعزلوا القتت السليمة من المولعة ويرموها على جنب ، وزعق الحج فارس وقال: ارموا بعيد عن حرون الناس لتولع الجرون كلها ياواد انت وهو !!.

فى الوقت ده ، كانوا حريم بيت عبدالعال يندبوا على خدودهم ويصرخوا ، ويقولوا ، ياخراب البيوت ، ياالنصيبة اللى دقت على راسنا ، والحاج عبد العال بارك فى القناية ويشيل فى التراب ويحط على راسه ويزعق بحسه المنحور ويقول: يبَى !!.. يبَى !!.. يبَى .. !! يابلط بيتك ياعبدالعال .. والناس ماسكاه ويقولوله : هدّى نفسك ياحج عبدالعال ، مش كدة ياشيخ ، زعق حفنى اب عنزة وقال : وحّد الله ياعبدالعال ، قدر ملاطف ياراجل ، والله ولا ضُفر فى عيل ، واللى ياجى فى الريش بكشيش ،.

حريقة في الجرون

زعق الحج عبدالعال وقال : بكشيش ايه ياحفنى ، اتبلط بيتى وتقول بكشيش ؟! قام نط حسين البس وقال : ربك عينه واسعة ياحج عبد العال ، عالم بالحال ، ربك مش بيرعى غنم ، واعى لكل حاجة !! مصمص الحاج دندراوى القطيم وقال : والله اللى ليه حق يخلصه ربنا ، واللى يحرق القمح يموت قبل حصيده !! وسعودى اب عبدالعال واقف وعنيه بتقدح نار اكتر من نار الجرن ويزعق ويقول :

حريقة في الجرون
حريقة في الجرون

دية قصدانية، عليا الطلاق قصدانية ، واحد ابن كلب رمى سيجارة ومشى ، زعق فيه الحج فارس وقال : طفى الاول ياسعودى ، بلا قصدانية ، بلا مش قصدانية ، مش وقته ياولدى ، اللى حصل حصل، ايه اللى بيدك انت تعمله دلوك ، يعنى حتفط ع القصب تغرِّقه ؟! ليها روقة ياولدى !!.

حريقة في الجرون
والنار مشعللة فى الجرن وعيال النجع ، داخلين وسط النار زى الوحوش ، قام فرج اب عزيزة ، ماسك قتّة سليمة من فوق ومولعة من تحت ، ومع اللهوة ماشافش النار اللى مولعة فيها من تحت وقام طوحها بعزم دراعة ، طبّت على جرن بيت خلاوى ، والناس ماواخداش بالها ، وشعللت النار فى جرن بيت خلاوى ، وطلعت الناس ترمح على جرن بيت خلاوى ، وسابوا جرن بيت العال لغاية مابقى رماد ، ولحقوا جرن ببت خلاوى بالمر وعزلوا اللى عزلوه وسيبه الباقى للنار !!.

حريقة في الجرون

 

حريقة في الجرون
وهديت النار واطفت لوحديها ، وروحت الناس ع البيوت كان العصر بيأدن : الله اكبر الله اكبر
زعق الحح عبدالعال وقال : الله اكبر فى الحايف وابن الحرام ، الله اكبر فى اللى بلط البيوت ، وحرق شقا عمرنا فى النار !!.

قد يهمك أيضا : دعكوني في البلاص بقلم عادل صابر

وبعد ماروحت الناس ، والنجع كله مفيش غير سيرة النار ، ومين اللى رمى السيجارة على جرن بيت عبدالعال ، وكل مايتفكروا فرج اب عزيزة اللى رمى القتة المولعة على جرن بيت خلاوى يضحكوا ويقولوا عميت يافرج !!.

وقعدت مع نفسى أفكر فى اللى حصل واقول ، عقب سيجارة مولعة حرقت جرن ، زى الندل اللى مالهوش عازة لما يدخل على عيلة مليحة بيخسّرها كلها ، والقتة اللى رماها فرج اب عزيزة على جرن بيت خلاوى وكلت نص الجرن ، زى المرة اللى من بيت نِجِس لما تتجوز واحد مدلدل من عيلة طاهرة بتبوّظ نص حريمها !! .

المرة العفشة فى العيلة الطيبة زى حريقة فى جرن قمح !! عائلات كتير كانت طيبة وطاهرة ونايمة فى امان الله فى الهوا النضيف النقى ، جاتلها واحدة من بيت عفش حرقتها حرق وقلبت عاليها واطيها ، وسرحت بعيد مع نفسى ومصمصت وقلت : ياخراب ببتك يا عبدالعال ، يابلط بيتك ياخلاوى ، يابووووى على غفلات الزمااان !!

الكاتب والشاعر : عادل صابر
الكاتب والشاعر : عادل صابر

شاهد أيضاً

احداث مسلسل المداح

مواعيد عرض مسلسل المداح أسطورة العودة والقصة والأبطال

يشاهد المتابعون من مختلف أنحاء العالم العربي، المسلسل الجميل “المداح 4 أسطورة العودة”. هذا المسلسل …

اترك تعليقاً