دعكوني في البلاص عادل صابر
دعكوني في البلاص عادل صابر

دعكوني في البلاص بقلم عادل صابر

دعكوني في البلاص بقلم عادل صابر .. الكاتب والشاعر الكبير  وبدون مقدمات تعالوا نستمتع بكتاباته التي تدهش الجميع حيث يقول :

وكله كوم وحكاية الحاج جاد ابو حيطة الله يرحمه كوم تانى !!
جاد اب حيطة كان راجل زى الوحش ، كان يمشى فى البلد يهز فى كتافه ، مطنقر العمة على المخّار ، ويتمايل وهو ماشى ولا حتى ابو زيد الهلالى ، كان جامد وطويل ، وشنبه يوقف عليه الصقر ، كان فى العراك يخوّف ، عند مانزل فى عركة ، يقعد يلقح فى الناس تلاتة تلاتة ، وأول الناس ماتشوفه طب فى أى عيطة ، كله يحط توبه فى سنانه ويقول يافكيك ، كان ماشايفش حد فى البلد ، والله يااخوانا كان لما ينعر ويقول ياواد يافنجرى ، كان حسه يزلزل النجع ، وبرغم دا كله كان بتاع معايش الله يرحمه ، مرة يتاجر فى الغلة ، ومرة يتاجر فى الفروج ، ومرة يبيع بطيخ ، واهى ماشية الدنيا معاه وخلاص ، و على قوته دى كلها ، كان طيب القلب ، سبحان الله !!

دعكوني في البلاص

وفى يوم كان معاه مشكلة مع ناس من البلاص ، عشان حق غلة ، وحساب بينهم وبين بعض ، واسترقصوله فى سوق الخميس ، وقابلوه وبعد السلام والكلام ، جرجروه على شِقة بعيد شوية على السوق ، عشان ماحدش يشوفه من البلد ويحرجوا عليه ، وكانو تلاتة من الشباب الفتوات ، وقعدوا يزعقوا مع بعض ، تدفع ماتدفعش ، قاللهم والله مادافع قرش ، واضربوا راسكم فى الحيط ياضلالية ، المهم الموضوع ذاد عن حده ، واستفردوا بيه العيال ، وقعدوا يلقحوه لبعض ، واحد يضرب ويزيحه على التانى يكمل عليه ، والتانى يلافيه للتالت ، لما طحنوه طحن ، وجاد خايف مايزعق ولا يصرخ ويقول الحقونى ، خايف لحد يشوفه من البلد وهو بيتضرب ، ويكسر ناموسته فى البلد وسط الناس ، اشتغلوا فيه الظنايا فين تاكل فين تشرب لما دعكوه دعك ، وخد علقة ماخدهاش حرامى فى زرنوق!!
المهم ساعة الضرب كان على ابو سحلول واقف فى السوق وشاف كل اللى حصل من عيال البلاص ، بس ماقدرش يتكلم ولا يحرج عليه ، لما شاف الطحن شغال فيه ، عمل نفسه مايعرفهوش لاحسن ياخدله طحنة زيه ، وبعد ماخلصوا منه ضرب ، بص جاد ابو حيطه مقبل لقى على اب سحلول واقف عما يتفرّج ، وشاف كل اللى حصل من أول العيطة، وأول مالمح على ابو سحلول عرف كل حاجة ، اتلهى ، وعمل زى المرة اللى اتكب طحينها ، وقالك بس ياواد ، ادى النصيبة اللى خدتنى وخدت ابويا ، ادى غفلات الزمان ، كله كوم وعلى اب سحلول كوم ،على اب سحلول راجل لوّاش وحيجرسنى فى البلد ، والى ماسمغش يسمع ، وعلى حيبرم البلد طارة يحكى باللى حصل ، وياكل ويشرب فى البيوت على ضهرى ،وقال فى نفسه ” والله واتفضحت يابو حيطة وحتبقى مسخرة فى البلد الباردة ، خلاص اتكسرت مناخيرك ياجاد ، انا عارف على عفش وحيفضحنى !!
وأول ماوصل البلد عمك جاد اتلم اتلمعلى على عمك على اب سحلول وخده على جنب وقال له : ياعلى ، انت عارف انى باعزك من زمان يابو عمو ، واحنا طول عمرنا مع بعض جيران الهنا ، وطول عمرنا فى الخير والشر ، دنقر على اب سحلول وقال ،: طبعا ياحاج جاد ودية حاجة معروفة للقريب والبعيد ، قاله الحاج جاد ،الله يبارك فيك يابو عمو ، طبعا انت شفت اللى حصل معاى فى البلاص ، من اول العيطة ، قال له على بشفقة وزعل : شفت ياحاج وصعبت عليا والله ، لكن ما باليد حيلة ياجاد ، كان نفسى احرج عليك واهت على ولاد الكلب ، لكن انت عارف البلاصية ، العيل فيهم كد الفلق وعند ما استفردوا بحد يجيرك ربنا ياقرببى ، اعذرنى ياجاد على قلة حيلى يابو عمو ، ويقرط على اب سحلول على نابه ويقول : يابووى ياقلة حيلى عليك ياجاد !! قال له جاد : انا عارف ياعلى ، انا ماكنتش عايزك تحرج عليا ولا حاجة ، انا عايز منك حاجة واحدة بس ، عايزك ماتجيبش سيرة باللى شفته لحد ، انت عارف قيمتى فى البلد ، وعارف ان بلدنا باردة ، وكله حيشمت فيا يابو عمو … قال على اب سحلول : برضه كدة ياحج جاد ، أومال انا عيل صغيّر ، لا ياراجل ، احتبرنى ماشفتش حاجة واصل يابو عمو ، احتبرنى مارحتش السوق من أساسه ياراجل !! قاله الحج جاد : الله يبارك فيك ياعلى، انا عارفك مليح وابن اصول ، طالع لابوك الله يرحمه ، وابقى غيب غيب وعدى غليا ياخى فى البيت ، اقعدلك شوية معاى ،دا احنا جيران ياراجل ، ضحك على اب سحلول وقال له : حاضر ياحج جاد ، دا يوم المنى ، احنا لينا غير بعض ياحج !!
ومن يومها كل يومين على ابو سحلول ياخد بعضه ويروح بيت جاد اب حيطه ، ويلقاه قاعد وسط عياله ومرته ، ويروح زاعق ويقول : والله كنت وحش فى عيطة البلاص ياجاد ، ايه دا يابوى ، قعدت تاخد تلاتة تلاتة فى وشك ، بيمين غول ياحج جاد ، عليا الطلاق خسارة فى بلدنا ، ينط الحج جاد ويقول : ههههههههه بس انت شوفت ايه ياعلى ، دا عيطة بسيطة ، اه لو شفتنى فى شبابى ياعلى ، وينده على الواد ويقول : هات كيلة غلة من جوا ياد يونس اديها لعمك على ، يروح يونس يجيب كيلة الغلة ويديها لعلى اب سحلول ، ويقعد قعدته وياخدها ويتوكل على الله ، ويصبر يومين ويروحله تانى ، ويلقاه قاعد وسط عياله ويقوم زاعق وقايل : عليا الطلاق ماشفت متيلك فى البلد ياجاد ، كنت وحش يابو عمو ، قعد تلقّح فى البلاصية لقّيح ، ايه دا يابو وحش واتطلق من جبله يابو عمو ، بيمين لو عركتين تلاتة زى كدة لتخلِّص على البلاص كلها يابوى ، ويضحك الحج جاد ويقول : ياواد يايونس قوم هات فروجة لعمك على من جوة ، نقيها عفية ياواد لجار الهنا ، وياخدها على ويقعد قعدته ويتوكل على الله . المهم قعد على اب سحلول كل يومين يروح بيت الحح جاد ، ويشتغل ، كنت وحش ، كنت غول ، وياخد فى الغلة والفروج والبطيخ ، لغاية ما جاد زهج من برود على ، وقال فى نفسه : وبعدين فى الراجل البارد ده اللى عملها سليوة ، دا من يوم العيطة بطل يشترى غلة وفروح ، دا بيته اتملا لطمة عينة غلة وفروج الراجل النطع ابن النطع ، عليا الطلاق دا البلاصية أسهل منه ، اتفضح اتفضح ، مش حينفع معايا الوضع ده ، وأول مادخل على ابو سخلول فى مرة من المرات وقال : كنت وحش ياحج ، عليا الطلاق دعكت البلاصية دعك !! قام فاطط جاد وراح زاعق من قعف راسه وسط عياله خشم الباب وقال : عليا الطلاق ، البلاصية دعكونى دعك ياناس ، بيمين خدت علقة ماخدهاش جحش فى مطلع ،عليا الطلاق لاحيب مكرفون واحطه على عربية وابرم فى البلد ، واقول البلاصية دعكونى ، اتطحنت فى البلاص طحن ، طلاق تلاتة البلاصية أسهل من على اب سحلول الراجل البارد اللى بلط بيتى بلط ،عليا الطلاق البلاصية ناس ملاح ، انا ماحدش دعكنى دعك غير على اب سحلول !! وقعد يصرخ جاد اب حيطة بعزم حسه : ياناااااااس ، الحاضر يعلم الغايب ، أهينى باقولكم ، دعكونى فى البلاص ، البلاصية طحنونى طخن ياناس ، الله ياولااااد . حوشوا منى على ابو سحلول ، لاحسن اطلّع روحه ، ماخلاش عليا غلة ولا فروج ولا بطيخ ، سد بيتى ياناس الراجل اللطخ ابن اللطخ !!

الأكثر مشاهدة:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: