نبأ خام
الحاج محمود الكداب موقف ضاحك حكاه لى عمى الكبير عزت الطيرى ، كان فيه فى نجع حمادى سوبر ماركت ، عليه يافطة مكتوب عليها ” الحاج محمود للتجارة ” ، وفى يوم كان الحج محمود قاعد جوه على الكرسى بجلابيته وعمته الكبيرة ، ورامى الشال الكشمير رمز الغزالة على كتافه ، وفجأة دخلت عليه غزالة ، سيدة فى منتهى الجمال ، الوش قمر اربعطاشر ، اللهم صلى على النبى ،الشعر سلب جمّال نازل على كتافها ، الصدر عجين خمران ، وبنطلون مقطّع على وراكها ، .
طبعا الحاج محمود شافها واتجن ، واللى خده ماجابه ، وقعد يفرز فيها من فوق لتحت ، وابتسم ، وطلع منديل هاندى من جيبه وقعد يمسح فى العرق اللى تنعر من وشه، وراح مطنقر العمة على مخاره ، وقالت السيدة بصوت موسيقى : صباح الخير ياحاح ، قاللها : صباح الورد .. صباح التين ، صباح المربى اللى على الرف ،ضحكت السيدة وقالت : حضرتك الحاج محمود صاحب المحل ؟! قاللها :
الحاج محمود الكداب
ايوه ياقمر ، هو بعينه ، قالت : ماشاء الله ، باين عليك ، راجل مكافح ، عشان صاحب المحل الكبير ده !! قاللها : الحمد لله ، ربنا كرمنى بأكتر من كدة بكتير ، ضحكت وقالت : هو معاك غير المحل ده ياحج؟! قاللها : الحمد لله ، معاى شركة فى شارع المحطة ، ادوات كهربية ، ومعاى شركة للمحمول فى شارع المحكمة ، دا غير الشركة اللى فى النجاحية ، والمحل اللى أبو حزام ، وان شاء الله حافتتح المول الجديد فى اولاد نجم ” محمودكو للتجارة والتوزيع ” ، قالت : ماشاء الله ، الله اكبر ، سبحان العاطى ، ربنا يكتّر ويزيدك من نعيمه ياحج محمود ،كل ده ملكك ، قاللها: لوحدى والله يااستاذة، انا ماأحبش الشراكة !! وحضرتك مين يا أستاذة ، نحب نتعرف بس ؟!
قالت : انا مأمورة الضرايب ياحح !!
قد يهمك أيضا:عادل صابر يكتب : شُخاخة طاهرة !!
طبعا الحج محمود أول ماسمع الكلمة ، اتلخبط ، ولسانه اتلت فى خشمه ، وغرق عرق ورمى المنديل الهاندى من يده ، وراح مطلّع المنديل المحلاوى من جيبه وقعد يمسح فى العرق وزعق وقال : بصّى يا أستاذة : أنا الحج محمود الكداب ، اسألى عليا فى أى حتة قوليهم عايزة الحج محمود الكداب كلها حتشاورلك عليا ، والله يابتى وباضحك على كدبى ، انا لامعاى شركات ولا محلات يابتى ، عليا الطلاق مامعايا غير الكدب يا بتى ، الكدب اللى بلط بيتى وودانى فى ستين داهية، بيمين مديون يابتى ، والكدب مغرقنى من ساسى لراسى ، انا الحج محمود الكداب ، الكداااب .
