نبأ خام
آمنت بقلبك الخاين
كما الضل ال كان ضامن
يبان واضح ف ضى الليل
وصدقتك كما الغافل
ومستنى يا دوب قشة
تمد إيديها وقت السيل
ومسألتش ف مرة دليل
ف من خيبتى وتغفيلى
طبيعى إن بختى يميل
قالولى كتير
ده مش شبهك
ولا طبعه شبه طبعك
وشكله عليكى مش باقى
ولا عندك دا هيفيدك
ولما هيعلى على ايدك
هينسى انه ما كان لاقى
فلو باقى
شوية عقل جواكى
عيدى التفكير
عشان لو مرة
قل بأصله ورماكى
مالوهش كبير
دى عشرة عمر
مش كوشة ولا زفة ولا طرحة
تعيشى العمر ليه حزينة
مقابل ساعة م الفرحة
وانا سارحة
..وبصاله…
ومش شايفة وشوش تانى
ولا سامعة
كإن الخيبة
نداهة وندهانى
وقفت ف ضهره قويته
بنيت بضلوعى حيط بيته
وزى ما قالوا عليته
وبان على أصله ورمانى
بقلم .. مجدى صالح
عضو نادي الادب بالعدوة بالمنيا
قد يهمك أيضا
آخر موعد للقاء .. شعر / محمد التمساح
