نبأ خام
قَتَلتْ وَلَدى
قتلت ولدى وخدت من قلبي الحشا
طب ليه يا ولدى
دا كان هييجى على الفطار
ويصلي ويّانا العِشا
امُه بقالها يومين مستنياه
وحالفة ما يصير الفطار
… غير معاه
قتلت ولدى وهو صايم
طب عملك بس آه
ولدى كان هيخش بُكرة
دخلته وفرحتنا بُكرة
عروسته اهى مستنياه
اياكش مش شايف يا ولدى
حبل نور فرح العريس زاين شارعنا
والدى جى والزفة جاهزة
والفرح معمول حسابه
والدبايح في الزريبه
كُلنا هنرقص معاه
دى البلد مستنياه
بدل ما نجيبوا بالزفة
نلف بلدنا كام لفة
يخش بلدنا على ضهره
وكفنُه معاه
قتلت ولدى
يا وِلْد يا عديم الربايه
علموك تقتل ولادى
بدون سبب وبدون حكاية
علموك تمسك سلاح
تقطع حشايا
ولدى لو كان يوم ظلم
والله ما اترحّم عليه
ولدى لو كان شاب ضايع
كنت سويت ياما فيه
بس ولدى كان جدع
ولدى كان راجل بجد
ولدى دخل الجيش بيضحك
كنت ببكى يوم ما سافر
قالى يابا بتبكى ليه
قالى يابا اوعاك تعيط
بلدى يابا وحبها باين عليه
قولى با ابنى قتلته ليه
لو غلط ولدى في حقك
كنت قولى
كنت شديتلك عليه
بس ولدى كان مربّي
عمر العيبة ما تطلع منه
ولا كان يغلط في اللى عليه
قتلت ولدى
طب قتلته بس ليه
آاااااااه يا ولدى
دخلتك صبحت زُعاق
وامك الغلبانة نايمة
فاكرة انك لسة حى
بدلة العُرس اللى جوة
كاويهالك ألف كىّ
كيف اقولّها مات عريسك
واكوى جوة حشاها كىّ
واخوك داير بيدعيلك
وعازم كل اهل الحى
واقول لعروستك الحيلة
عريسك مات وماهوش جى
قتلوه كلاب السكك
ولا حبل نور ولا ضيّ
………..
بس عارف كيف يا ولدى
انت راجل
انت هتكون الشهيد
على قد حرقة قلب ابوك
على زى مانا حاسس ب عِيد
هجرى اقول لامك تقوم
تفرّق الكحك اللى قاعد ع الصيجان
جوة البيبان
على الجيران
وكل اهل الحى
هقولها اوعاكى تبكى
ابن عمرك لسة حى
ابن عمرك راح بيضحك
بس جاى
جاى في صندوق الشهيد
ملفوف عليه علم الكرامة
والشهامة وصورته جوة النعش ضي
اوعى تنطقي ابنى مات
دانتى ابنك عند ربنا لسة حى
……………..
رحم الله شهداء الوطن
………….
تأليف عماد عزيز
عضو نادي الادب بالعدوة بالمنيا
قد يهمك أيضا
