نبأ خام
من غير ما تثبت بالدليل
منتاش كفيل بالشك وحده يِوَجِهَك
بوصلة الأحزان تِمِيل وتَِنبِهك
نقطة الضوء اليتيمه
بتِشِبِهَك
وانته بتشبه ف الخجل طعم الهزيمه
صور قديمه لضحكتين ملهمش طَعم على الورق
كارت الصداقه اللي اتحرق
وصحاب ورجعوا من السَبقّ
للعرض ف الفتارين
الوقت جثة مين ؟
الذكريات شايله الحيطان ولا الحيطان شايلين همهم
مفيش يقين هيلمهم جمله
من غير ماتثبت بالدليل
الدمعه مش حامله تفاصيل الغياب
كل اللي خاب جثه وحكايه بور
قصه ورماها الوقت
من سجل الحضور
هُمَّه الضلام الغبي
وِانِتّه نقطة نور
