الأربعاء | 2024.02.21 | 12:35 ص

الجاموسة اتسرقت !! بقلم : عادل صابر

الجاموسة اتسرقت !! من سنين فاتت ، وفى قرية من قرى الأقصر ، وقفوا جماعة بعربية ربع نقل جديدة ، مكتوب عليها ” القناة الثامنة ” ، كان فيها اتنين لابسين أفندية بنضارات والتالت السواق ، وماسكين كاميرات ، واتلموا أهل القرية عليهم ، وسألوهم عن المطلوب ، قالو ا : والله احنا بنصور فيلم اسمه ” اللصوص ” ،.

وعايزين اكبر جاموسة فى البلد ، حناخد بيها لقطة لزوم الفيلم ، وان شاء الله كلكم حتظهروا فى الفيلم ، حنرّكب الجاموسة على العربية ، ونمشوا بيها ، وانتوا حترمحوا ورا العربية ، وتقولوا الجاموسة اتسرقت .. الجاموسة اتسرقت ، وطبعا الكاميرات حتصوركم وانتو ترمحوا ، يعنى المشهد مش حيستغرق خمس دقايق لزوم الفيلم ، وصاحب الجاموسة ياخد جاموسته و٢٠٠ جنيه على تعبه .

قام نط الحاج ابو المجد السلخ وقال : الجاموسة عليا انا ، جاموسة عفية حتعجبكم ، مشتريها امبارح بعشرين الف جنية من سوق الاربع ، يعنى جاموسة حتشرفكم ان شاء الله ياباشا ، وراح الحج ابو المجد جاب جاموسته ، وركبوها العربية ، ووجه المصوراتى الكاميرا على الناس ، ونادى المخرج وقال : استعدوا ، احنا حننطلق بالعربية والجاموسة ،.

وحضراتكم حتجروا ورانا ، وتقولوا الجاموسة اتسرقت .. الجاموسة اتسرقت ، خلاص يااخوانا ، ردوا بنفس واحد حاضر ياباشا ، وراح مطلع المخرج من جيبه ٢٠٠ جنيه واداها للحج ابو المجد ، وقال له : شكرا ياحج ابو المجد ، جاموستك حتنور الفيلم وحتبقى أشهر جاموسة فى البلد ، وضحكت الناس والحح ابو المجد حط المتين جنيه فى جيبة وهو مبسوط ، ونادى المخرج وقال : ياله ، جاهزين ، وبص على المصور وقال :

استاند باى ، وانطلقت العربية ، والناس وراها يرمحوا ويقولوا : الجاموسة اتسرقت .. الجاموسة اتسرقت .. والعربية سرعت قوى عشان توقف مفيش وقفان ، لغاية الناس مافهمت اللعبة ، وان دول حرامية ولاد كلب سرقوا الجاموسة فى عز النهار، والناس من كتم الضحك مش قادرة ترمح ، وراح زاعق الحاج ابو المجد السلخ صاحب الجاموسة ،وقال :

عليا الطلاق ماحد يرمح تانى ، انا اللى استاهل اللى ركَّبت جاموستى بيدى ، وقعد يضرب كف بكف ، ويقول عليه العوض ومنه العوض ، عليه العوض ومنه العوض ، انا اللى طلعت جاموسة ، انا اللى طلعت جاموسة ، واستاهل ضرب المركوب !!

قد يهمك أيضا :عادل صابر يكتب : حريقة فى الجرون

شاهد أيضاً

انقطاع الكهرباء

بدايةً من الغد.. انقطاع الكهرباء بمصر يومياً لتخفيف الأحمال في هذه المواعيد!

عقد الدكتور مصطفى مدبولي، رئيس مجلس الوزراء، اجتماعًا اليوم لمتابعة خطة تخفيف الأحمال الكهربائية على …

اترك تعليقاً